فيروس كورونا ضد المغرب 2020 – ماتش صعيب

فيروس كورونا في المغرب

كاينة واحد الشريحة من المجتمع المغربي واش كبيرة أولا صغيرة الله بوحدو لي عالم، مستهترة جدا بما يقع. هاد الناس هادو ماعندنا مانديرو معاهم. مايمكنش توعي شعب فسيمانة و غير عن طريق الفيسبوك و الإنستاغرام.

هاد الاستهتار كاين فجميع دول العالم ماشي غير عندنا حنا. و هادشي سبابو انه اغلبية الشعوب ماعمرها عرفات اشنهي يكون وباء في الدولة ديالهوم. لذلك تاواحد ماعرف بحق هاد المرحلة حتى ندوزو منها.

الحل الوحيد فهاد الظرفية هو حظر التجوال بالقوة من طرف الدولة، و لكن هاد الحل ماشي فيدينا كشعب و لذلك نركزو على الأشاء لي نقدرو نديروها حنا كأفراد و لي في نهاية المطاف غتنفعنى كجماعة.

فيروس كورونا المستجد بدا فأواخر عام 2019 في الصين و الحمدلله لي بدا في دولة جد جد متطورة بحال الصين. لي قدرات نوعا ما تسيطر على الوباء وبذلك عطات أمل لباقي دول العالم.

حتى شي دولة في العالم ماقادرة تغلب فيروس كورونا لحد الآن

هاد الوباء يبدو بأنه حتى دولة فالعالم ماقادرة عليه بشكل كامل. الصين بمؤهلاتها العضيمة و تكنولوجياتها المتطورة و شعبها المنظبط و الممتثل لأوامر الدولة، احتاجت شهرين على الأقل لاحتواء الوباء و الحد من انتشاره.

إيطاليا بنظامها الصحي و شعبها الحضاري لحد الساعة ماقدراتش تسيطر على الوباء داخل أراضيها

ابران كذالك الوضع فيها لا يبشر بالخير، فرنسا و اسبانيا غاديين حتى هما في نفس الاتجاه السلبي لفقدان السيطرة على الوضع.

في نفس الوقت كاينة دول اخرى كألمانيا، كوريا الجنوبية و الولايات المتحدة الأمريكية لي يبدو أنها نوعا ما الوضع لديها تحت السيطرة رغم الوصول إلى آلاف الحالات المصابة بفيروس كورونا.

فيروس كورونا في المغرب

حنا في المغرب مازال ماوقعت عندنا حتى حاجة لي كاتخلع، الوضع مازال تحت السيطرة، و خاصنا نديرو الثقة التامة في الجهات المسؤولة لي لحد الآن برهنات لينا كشعب أنه يعول عليها في هاد المحنة، لذلك مكاين لاش الواحد يستبق الأحداث و يزرع الرعب فراسو و فالناس لي دايرين بيه.

لحد الان المغاربة كيبانو متحدين كجميع شعوب العالم في هاد المحنة، و كيبان بأنه الشعب ملتزم الى حد ما بتعليمات السلامة، و لكن هادشي ماكافيش، يقدر حفنة صغيرة من الطبقة المستهترة تضرب لينا كولسي فالزيرو، لذلك المخزن خاصو يتدخل و يفرض حضر التجوال و الاختلاط بالقوة. لانه فعلا كاينة واحد الكتلة ديال البشر كيسحاب ليها بلي راه محصنة إلاهيا و ما غيصيبها والو و موت واحدة لي كاينة و كاينة واحد الفئة أخرى كاسحاب ليها انه حيت كاتفطر بزيت العود و الزميطة و كتاكل خانز و بنين ديال الكفتة ديال الحمير، صافي راه المناعة ديالها قوية جدا و فيروس كورونا ماغيصور منها والو، و ما عرفوش بلي ف وهان البلاصة لي بدا فيها الفيروس الناس تما كياكلو المشاش و الخناش و الكلاب والضفادع و مع ذلك هلكهم الفيروس.

ماعندناش الوقت

هو صراحة ماعندناش الوقت بزاف باش نشرو الوعي بمعايير السلامة لي هي في الاصل من البديهيات. الوقت لي عندنا الان حنا كأشخاص عاديين و عندنا شوية ديال الوعي بخطورة الوباء العالمي خاصنا نستغلوه فالبحث و معرفة اكثر عدد ممكن من المعلومات عن هذا الوباء للاستعداد لما هو أسوأ.

هاد المرحلة بدون شك غادي تكون صعيبة علينا كاملين، غتختلف درجة الصعوبة من فئة لأخرى، ولكن الشيء المؤكد هو أن الانسانية جمعاء غدي دوز أصعب مرحلة في تاريخها الحديث. حنا كمغاربة مزال في المرحلة الاولى من الازمة، يقدر هاد المرحلة تستغرق اكثر من 14 يوم، يمكن تبقى شهر او اكثر، هنا فين كيجي الدور ديال الناس لي واعين بهاد المرحلة و جميع المخلفات ديالها.
من هنا لبضعة ايام الناس غيحسو بإحباط شديد لي يقدر يأدي بالبعض للإكتئاب، و هادا امر عادي لأنه حنا كمغاربة ماعمرنا عشنا شي مرحلة صعيبة في السنوات الاخيرة، هادي فرصة نيت باش نعرفو بحق الحياة لي كنا عايشين قبل هاد الجائحة. الشيء الاجابي من هاد الوضع انه ملي غايسلي هادشي كامل الانسان غايولي يشوف الامور بشكل ايجابي اكثر و غايولي يقدر حياتو بشكل اكثر

الدور ديال الناس الواعيين كيتجلى في ضبط النفس و نشر جو ايجابي مابين عائلته و الناس لي دايرين بيه في عز الازمة.
الناس لي كايقولو دابا بلي كاينة موت وحدة و بلي ماخايفينش من كورونا كن معايا أكيد هوما الناس لي غادي يديرو فيديوهات كايناديو فيها الملك باش يشوف من حالهوم ملي غادي يصيبهم هوما اولا افراد عائلتهم فيروس كورونا لي ماخايفينش منه الآن. هوما نفس الناس لي غادي يجلسو قدام باب المستشفيات ويعايرو الدولة و المسؤولين و لكن غايكون ديك الساعة مشا الحال على كولشي. هاد الناس كايبقاو محسوبين علينا و كلنا مغاربة و كنتمناوهوم يوعاو مع الوقت، باش يفيدو راسهم و يقلال الجهل في المجتمع المغربي.

السيناريوهات المحتملة لوباء فيروس كورونا في المغرب

السيناريو الأول، هو أنه ماتصاعدش الحالات المصابة بشكل صاروخي و يبقى الوضع غير مخيف، وبالتالي غيعطي أمل للناس أنه الأمور غترجع كيفما كانت قريبا.

السيناريو الثاني هو أنه تكون عندنا حالات كثيرة و توقع كارثة وبائية في المغرب، و هادشي لي تاواحد فينا ماكايتمناه. ولكن مع هاديك الطبقة المستهترة و الغير منضبطة و النظام الصحي لي على قد الحال فالمغرب، هاد السيناريو الثاني محتمل جدا. لذلك خاصنا نستعدو لما هو أسوأ و نوجدو راسنا مزيان نفسانيا.

خاصنا نستعدو نفسانيا لهاد المرحلة الصعبة

فهاد المرحلة الصعبة كل واحد فينا يحاول يسيطر على الوضع في المنزل ديالو. إلا طول الوضع بحال هاكا، بعض أفراد الأسرة ديالك يقدرو ينهارو و يدخلو فحالة نفسية غير مرغوب فيها، هنا كيجي الدور ديالك كإنسان واعي بظروف المرحلة. غادي يخصك تلطف الأجواء و تزرع روح التفاؤل و الإيجابية مهما طال الوضع.

و حاول بشكل مستمر تفكر أفراد عائلتك بضرورة تطبيق معايير السلامة بشكل دائم و مؤكد.

إلا قدر كل واحد فينا يحمي راسو و عائلته من الإصابة بالفيروس راه هاداك هو الهدف

كول ماكلة مزيانة و شرب الماء و ديها فراسك مزيان ونعس مزيان باش مايوقعش ليك لي يخليك تمرض . لأنه فهاد الآونة واخا تمرض غي بشي حاجة بسيطة يقدر يجيك الوسواس و تزرع فراسك و فعائلتك الرعب.

ركز على الجانب النفسي بزاف فهاد المرحلة، بما أنه افراد العائلة كلهم جالسين فدار واحدة، فمن الطبيعي يوقعو بعض المناوشات او سوء التفاهم و النڭير، بين الواليد و الوالدة او بين خوتك بنات اولا دراري. فهاد الحلات حول تكون نتا هوو المترونوم ديال الدار و شرح ليهم بلي فهاد المرحلة هادشي عادي يوقع و لكن ماخصناش نخليوه يعكر لينا الجو العائلي فالدار هاد الأيام لانه معندناش مفر او متنفس آخر من غير الدار هاد الايام، لذلك خاص افراد العائلة كاملين لي كاينين فدار واحدة يضبطو النفس و يسمحو فحقهم و يكبرو عقلهم فهاد المرحلة الصعبة لي مشاركينها كاملين.

تحية للدولة المغربية

وباء فيروس كورونا بين على انه الناس لي حاكمين هاد البلد يعول عليهم، و هادشي بان من خلال حسن تدبير هاد الازمة لي حتى الدول المتقدمة مخداتش قرارات حاسمة كيفما خداتهم الدولة المغربية في الوقت المناسب.
بهاد الاجراء ات المغرب غيتجنب اصابة اعداد هائلة من المواطنين. خاص غير الشعب الامتثال و الانظباط التامين.

تحية كبيرة للدولة المغربية بجميع مؤسساتها و تحية كبيرة كذلك لجميع المتبرعين لصندوق مكافحة وباء كورونا في المغرب. و نتمناو من الدولة المغربية تزيد من الإجراء ات الايجابية فهاد المرحلة الصعبة، و تخفيف المصاريف على المواطن المغربي كيفما كانت الطبقة لي كينتمي ليها.

المرجو إعفاء المواطنين من الفواتير التالية:
– الماء
– الكهرباء
– الانترنيت
– الكراء

ولكن من المستحسن عدم الاعلان عن عفي المواطنين من فواتير الماء و الكهرباء حتى تفوت هاد المرحلة، خوفا من وقوع استهتار و استعمال الماء و الكهرباء بشكل مسرف من طرف الفئة المستهترة المحسوبة علينا.

الدولة دار خدمتها و مازال كاديرها، الباقي علينا كافراد لي كنشكلو المجتمع ديالنا المغربي. كل واحد يبقى فدارو و يتبع بالحرف تدابير السلامة.

تحية كبيرة للمؤثرين لي باغين الخير لهاد الوطن

المؤثرين على الانترنيت محتاجينهم أكثر من أي وقت دابا في هاد المحنة. الناس دابا كادووز وقتها كامل على مواقع التواصل، وخاص المحتوى ليكيتنتج حاليا من طرف المؤثرين المغاربة يكون محتوى 100% توعوي حول هاد الوباء العالمي. كل واحد يساهم و ينتج محتوى توعوي و يفيد بيه الامة لي ماقادرش يكفي انه يشارك مع متتبعيه محتوى لي يوعيهم فهاد الازمة. حتى تفوت هاد المرحلة و كل واحد يرجع للمجال ديالو.

هاهوما بعض المؤثرين لي كايديرو مجهود رائع في هاد المرحلة، و يستحسن متابعتهم للاستفادة:

نجيب المختاري

Simo Life

مروان المحارزي العالمي

مصطفى الفكاك

قصة مصطفى الفكاك المعروف ب “سوينكا” صاحب قناة أجي تفهم

أمين رغيب

أميرة مرتضاي

https://www.instagram.com/p/B9zTJdHlvCj/

تعرف أكثر على فيروس كورونا من خلال المنظمة العالمية للصحة

اترك رد